觀塘一位網民喺社交平台群組貼相，指喺某連鎖超市見到一份售價約26元嘅肥牛，包裝標籤寫住「特級美國精選肥牛」，但打開望入去，大部分係雪白脂肪，只有極少量紅肉，明擺「膏多過肉」，惹來網民圍住開槍。
貼相嗰位開頭仲揶揄話「今日喺觀塘見到正宗肥牛」。相入面貨架最頂層嗰份標籤26.1元，商户明明寫住「精選肥牛」，但裏面實屬「肥牛」名不符實，差唔多係一塊牛油，自然引來熱議。
留言區笑聲一片：「真精選，唔肥唔選」、「明明係脂肪」、「我淨係見到肥，見唔到牛」、「呢啲叫牛肥，唔係肥牛」、「奶白色肥牛，可遇不可求」。
笑完有網民話回頭望，「肉檔抌出嚟嗰啲，仲多肉過佢」。
不過都有一派認為商户夠老實：標明價錢，消費者自己睇清楚再揀。「明碼實價呢個價錢，你又睇到裏面係點，反而我覺得係公道」，「咁都好過鋪三塊靚喺面，而底嗰啲先係咁」。
更有人已經諗好用途：「叫牛油算啦」、「開鑊底一流」、「拎少少用，唔使落油」、「26.1元OK啦，買嚟起鑊煎牛扒」。26元唔算貴，起鑊啲都唔算浪費。
姣姐講多句： 「精選」呢兩個字，而家成咗超市最敢用嘅字眼。特級、美國、精選，一齊落喺標籤，包裝靚過餐廳，打開係奶白色牛油。呢種「正宗」，真係可遇不可求。
