前AOA成員兼演員權珉娥近日公開披露失聯親姊嘅真名，並就警方處理失蹤報案一事點名管轄警員實名開罵，惹來「越界」定係「公民問責」嘅大討論。
權珉娥喺9月27日透過個人社媒發文，指母親當時處於心跳停止狀態，並急呼尋找失聯嘅親姊。翌日（28日）早上，她補充講明母親已入住高陽市明知醫院加護病房，有腦損傷、情況危殆，更罕有地公開親姊嘅完整姓名，急籲大眾幫手尋人，喊話「如果有人看到她，拜託幫我傳個話」。
佢喺貼文對親姊大發雷霆，就警方處理失蹤個案嘅態度炮轟管轄嘅元堂派出所及負責警員，直接點出警員真名，指警方多次只肯確認「生死」、卻不交代本人下落。情緒激動下，佢一度脱口扯到韓國連環殺人犯，其後似意識到不妥，改口稱「加害者們都成了贏家」。
呢場風波並非無緣無故。權珉娥喺9月初已指控親姊侵吞佢、母親同友人嘅資金，總額約7至8億韓圓，並揚言以詐欺、侵占罪採取法律行動，家族糾紛早已公開化。
不過，儘管佢承受嘅心理痛苦同焦急可以理解，但公開點名警員真名、更扯到連環殺人犯，被視為明顯越線，引來批評同憂慮，佢最終選擇關閉IG。
姣姐講多句：面對公權力，公民有權問責；警方處理失蹤個案若真有所怠慢，理應接受監督。但「問責」同「公開點名個人、人身攻擊」之間有條界線：質疑制度同公職人員履職，同將個人拉到網上被圍攻，係兩回事。同情權珉娥嘅處境，但公共討論要留條底線。
黃姣姐整合｜頂硬上
