河南開封萬歲山武俠城，日前有一名古裝女NPC喺社交平台爆紅。佢唔係喺度比心自拍，而係身穿漢服，喺舞台邊以剛勁有力嘅手勢，逐句替坐在「愛心專座」嘅聽障遊客翻譯實景演出。相關片段流傳開，佢嘅手勢配合武俠劇情，被網民封作「萬歲山最夯NPC」。

呢位爆紅嘅女主角叫高明佳，21歲，來自洛陽，就讀鄭州工程技術學院特殊教育專業四年級。佢喺十一國慶期間負責《三打祝家莊》嘅手語翻譯。網上片段見到，佢嘅翻譯並非刻板比劃，而係緊貼演員動作，實時譯出台詞同旁白，手勢有力度、有武俠味，同台上嘅打鬥場面互相呼應。

原來佢呢份「NPC」工作，係今年7月中旬開始嘅實習，主要負責《三打祝家莊》同「打鐵花」等演出，平日一日約3至4場。高明佳澄清自己並非聽障人士，只因有聾人朋友反映到景區「聽不到」演出，佢看到招募公告後便希望以專業所長為無障礙建設出力。

景區方面表示，手語翻譯服務免費提供，平日都有常規安排，唔係國慶限定；事實上萬歲山早於今年6月已引入首位駐場手語翻譯。呢份原本喺舞台角落默默進行嘅工作，如今經遊客鏡頭傳開，終獲得關注。

姣姐講多句：成日都見到景區請古裝NPC喺度賣萌比心搏流量，萬歲山呢位NPC最叻嘅地方，係把最硬核嘅無障礙服務，都做嘅好型——手勢一出，比乜流量密碼都得用。呢種「最夯」，係認真同温度堆出嚟，唔係濾鏡濾得嚟。