視后江美儀被炮轟「假善心」風波後，喺10月17日首次公開露面，出盡《善心滿載仁愛堂》活動，不過佢事先已經透過公關講明：唔接受訪問，亦唔拍照。
風波起頭點？據悉江美儀兩年前曾拍攝TVB綜藝節目《一個好人》，做義工幫基層滅蟲。近期，滅蟲組織負責人陳家駱（阿臣）突發長文，指控佢當日拍攝時遲到兼態度高冷，喺現場拿着蒸氣機擺姿態拍攝兩小時後便離場，將剩餘98%嘅滅蟲工作留俾佢一人處理，批評佢虛偽行善、只做做騷，並非真心行善。其後陳家駱更不停喺社交平台發帖狙擊。
事主嘅回應呢？江美儀早前以短訊回覆傳媒表示：「唔係事實嘅嘢，唔回應啦，多謝！」隨後佢喺社交平台再引用魯迅經典名句「橫眉冷對千夫指，俯首甘為孺子牛」表態，意味深長。
姣姐講多句
講真，有人指控你，最安全嘅做法就係「冷處理」，但有人指控你假善心，你再「橫眉冷對千夫指」，就係用文學手段迴避事實，將沉默包裝成文學修辭。用魯迅名句當迴避回應，係我睇過最文學嘅逃避。
但講到頭，佢出席慈善活動卻聲明不受訪不拍照，將「冷對」做到腳趾尖。千夫指到頭都唔講一個字，咁「俯首甘為孺子牛」嘅牛，係邊隻喎？
