江嘉敏近年積極經營社交平台，日前開直播同網民近距離互動。直播間留言區有網民指佢「好串嘴」，佢睇完完全唔閃避，即席反擊：「聽講你好串嘴……唔使聽講啦，你兩隻眼睇緊㗎嘛！」講完仲露出燦爛笑容，坦然接受網民評價，展現爽朗大方嘅性格。
被問到工作安排，佢透露目前行程相當緊湊，除咗拍攝 HOY TV 處境劇《你的保安 李寶安》外，仲要準備舞台劇嘅排練。有網民關心佢係咪有經濟負擔，佢坦白承認：「各有各交租壓力啦！我都要交租㗎！又冇得靠爸爸媽媽，所以要努力工作！」
當被問到合約狀況時，佢更幽默自嘲：「現時約滿？唔係現時約滿，係約滿咗差不多兩年啦！」呢種隨和自然嘅對答獲不少粉絲留言支持，讚佢真性情且 EQ 極高。
江嘉敏自 2025 年 2 月宣佈離開效力 9 年嘅 TVB 後，便毅然跳出傳統電視台嘅「舒適圈」，展開自立門户嘅演藝生涯。告別大台庇護後，所有接 Job 合約、接洽宣傳以至日常開支均由自己一力承擔，生活成本同經濟負擔自然不可同日而語。佢早前接受電台專訪時亦曾坦承，離巢係希望趁年輕嘗試更多不同領域，即使自薦參演舞台劇、收入緊絀亦無怨無悔。
姣姐講多句：名媛光環冇咗，大家都係打工人，要交租、要還貸、要揾飯食。佢呢啲「自曝」其實就係香港女仔最真實嘅一面。
