江華日前喺社交平台激罕Po了一段同太太麥潔文台上合唱《分分鐘需要你》嘅片段，入面仲大讚「老婆你今晚真係好靚呀」，然後不忘串一下「你啲聽力有啲問題，所以慢咗好多拍」。跟住更罕見咁發咗篇長文，就「一生所愛」呢四個字，寫咗番自己嘅體會。
佢話，細個唱《一生所愛》，唱嘅係至尊寶同紫霞仙子嘅遺憾，覺得愛要轟轟烈烈、痛徹心扉，「哪怕飛蛾撲火都要撲一次」；但「當你真的走過咗大半生，再回頭看呢四個字，你會發現，佢變得不再那麼喧嘩」。佢寫道：「一生所愛，或許就係此刻坐喺你身邊，個陪你由青春走到白頭嘅老伴。你哋之間，或許早已冇咗當年嘅激情，甚至連『我愛你』都很久冇説出口。但你哋之間，有一種更深嘅嘢：係默契，係陪伴，係知道無論發生咩，轉過身，呢個人都喺度。」最後更講：「『一生所愛』並不僅僅係某一個具體嘅人或者事。佢係一種能力。係你行過咗那麼多路、受過那麼多傷、看過那麼多離合之後，依然願意去愛嘅能力。」
呢篇文之所以耐睇，係因為佢唔係空喊甜，而係踩喺一段確實唔容易嘅34年婚姻上面。江華同麥潔文結婚34年，育有一對仔女，33歲大仔陳耀淙投身醫護界，細女陳薔天繼承媽媽衣缽加入樂壇。兩人曾陷過婚姻危機：1996年江華同鄧萃雯因亞視劇集《我和春天有個約會》合作擦出火花，並被傳媒影到連續6日出入對方寓所，婚外情斷正。後來麥潔文選擇原諒，兩人重歸於好。
姣姐講多句：呢種「行完風暴、轉個身人仲喺度」嘅愛情，其實比任何偶像劇都更值得寫。佢冇用「我愛你」呢三個字，就用「轉個身，呢個人都喺度」，已經講盡晒「一生所愛」最真實嘅意思。
黃姣姐整合｜頂硬上
