日本有一位主打帶住兩個細路全球travel嘅旅遊YouTuber「有毅力的Yuri母子行」（ど根性ゆりの母子旅），近日因為帶住3歲同5歲嘅兩個幼童，大閘闖入阿富汗同伊拉克庫爾德斯坦地區，喺社交網絡鬧到風聲水起。
問題嘅係，呢兩個地方係日本外務省列為最高危險等級4「撤離勸告」嘅地帶。佢哋喺當地唔單止高調打卡拍照，更公開話「治安好到驚人，甚至比日本仲安全」。
有網民出嚟質疑，佢仲反嗆話外務省嘅資訊「根本不可靠，落差大到感動落淚」，叫大家可以親自去看看。呢番言論瞬間引爆輿論，各界強烈撻伐。
日本外務省海外邦人緊急事態課表示，已收到多宗民眾投訴電話，並通知當地使館密切留意佢哋動態。外務省直言，最高等級4代表隨時有可能面對恐襲、綁架或交通中斷而受困嘅極高風險，「自己碰巧平安無事，絕不等於整個地區安全」。雖然政府無法強制禁止市民去，但為咗吸引網絡關注而冒險，一旦發生意外幼童將無辜受害，而且政府喺戰亂地區嘅跨國救援極為艱鉅，切勿將個人幸運包裝成安全背書。
（編按：事主喺10月18日喺X發文，稱已經回國。）
網民一面倒批評：「根本係將孩子當賺流量嘅籌碼」、「出事又係全民買單怪政府唔救」、「唔好將運氣好當治安好」。輿論普遍譴責，追求獨特旅行體驗係個人自由，但帶住毫無防衞能力嘅幼童涉足險境，絕非拓寬視野，係拿孩子嘅生命安全開玩笑。
硬蕉抽兩句：帶細路去戰區仲話「比家鄉安全」，呢種自我感覺良好嘅安全觀，同那些帶BB喺迪士尼樂園「寄存」嘅父母一樣，係將兒童安全係數當「碰運氣」嘅遊戲。流量係賺到，但條命只有一條，唔可以用孩子做風險測試。
硬蕉哥整合｜頂硬上
