講到日本神社，最易入眼嘅就係入口嗰只朱紅色嘅鳥居。呢個神道教嘅傳統建築，經歷咗地震、颱風，甚至原子彈爆炸都企穩喺度，海外好多人都好奇佢點解這麼「頂硬」。原來答案就喺柱底嗰幾塊石頭。
底部嘅「沓石」黑科技
為咗令鳥居穩定，古人喺柱子底部放咗名為「沓石」嘅石塊。沓石本身係空心，鳥居嘅柱頭就插落去個孔入面嵌合住，而唔係用水泥或者鋼筋焊死。
平時因為鳥居本身重，唔會輕易移動；地震一嚟，沓石同柱子因為並非完全固定，受力反而會被分散，起到類似現代避震器嘅作用。面對颱風等外力，原理大致相同。呢個傳統先人防震智慧，就係鳥居能夠穩定不倒嘅秘訣。
朱紅色原來係防腐材料
講到朱紅色，神道教角度認為硃色能對抗邪力、象徵生命躍動，所以宮殿神社都愛用。但撇開宗教觀點，製作硃色嘅材料就係能防腐嘅水銀。
圖片：JordyMeow／CC BY-SA 3.0／Wikimedia Commons
日本做海島國家，濕氣重又落雨多，木造鳥居好容易受潮腐爛。硃色就剛好可以防住潮氣，進一步延長鳥居壽命。宗教同工程，一次過搞掂。
仲有「色違」鳥居
雖然大部分鳥居都係朱紅色，但日本都有少數「色違」鳥居，有藍色、粉色、金色。喺栃木縣嘅足利織姬神社，仲有七種顏色嘅鳥居排喺度。呢啲異色鳥居，有嘅係跟隨神明信仰，有嘅係配合觀光地特色。
下次你去日本行神社，唔好淨係影相，留意下柱底嗰塊「沓石」，千年前嘅先人已經知道要加避震，呢個「古早黑科技」真係頂硬。
硬蕉哥整合｜頂硬上
