日本電子書平台「BookLive」最近公佈咗一項統計，分析自家平台上架嘅日本漫畫標題。數據顯示，日本漫畫標題喺近 15 年間不斷變長：2011 年平均 9.14 字，到 2026 年升至 18.45 字，長咗超過一倍，而且呢個趨勢可能仍會延續。
將作品拆開睇，女向標題變長幅度更誇張。2011 年女向作品標題平均 9.26 字，男向 8.91 字；到 2026 年，女向升至 19.46 字，男向係 17.11 字，女向不但原本較長，升幅仲大。
報告指，標題常用詞出現巨大改變。少年及青年漫畫 2011 年最常見詞為「魔法、女孩、世界、遊戲、老師」，2026 年變成「最強、異世界、轉生、世界、無雙」；少女及女向作品 2011 年係「戀愛、結婚、浪漫、童話、新娘」，2026 年則為「大小姐、溺愛、結婚、王子、公爵、壞人」。異世界轉生、壞人大小姐等網絡小説流行並漫畫化，被視為拉高平均字數嘅主因之一。
BookLive 同時指出，近年讀者重視時間效益同 CP 值，希望睇標題就知內容，避免「讀完發現同想像唔同」，因此出版社愈傾向將簡介直接寫入標題。
姣姐講多句：標題長到好似產品説明書，係讀者太挑剔定係出版社太誠實？異世界、壞人大小姐呢啲詞一出現，腦海已經有畫面，想唔長都難。
黃姣姐整合｜頂硬上
