長野縣茅野市有艘喺半空搖搖晃晃嘅「船」，冇任何橋墩支撐，純靠幾條鋼索吊住。佢唔係船，係間茶室。建呢嘢嘅人叫藤森照信，東京大學榮譽教授，今年踏入80歲。
呢艘「空飛泥舟」（Flying Mud Boat）2010年落成，原本係配合茅野市美術館嘅特展，由藤森帶住一班當地市民一齊砌。材料全部係天然嘅：泥灰、手劈木板、銅皮屋頂，冇一粒混凝土。底部冇基座，全靠鋼索拉緊。
藤森照信話，佢由學生時代已經想建座懸浮嘅嘢，一等到45歲先至正式「落手」。
呢個地方唔止「空飛泥舟」，同一塊地仲有兩件「極端作品」：2004年落成嘅「高過庵」，架喺兩根栗樹幹頂，離地足足6米，想入去要爬長梯；喺「高過庵」嘅影子正下方，藤森照信挖咗個坑，砌咗一座半埋喺地底嘅「低過庵」。高、低、飛，三件喺度。
圖片：Jarudog／CC BY-SA 4.0／Wikimedia Commons
近日呢艘泥舟喺海外網絡再度瘋傳，被網民形容為「現實版吉卜力世界」。平時佢重門深鎖，要等特定導賞日，由工作人員喺船底架起木梯，先可以手腳並用地鑽入狹小艙門。入到去，木質裝潢同圓窗營造出温暖空間，隨住微風搖曳，透過天窗觀雲品茶。
每年4月至11月接受預約，提供英語或日語導賞。天然建材脆弱，內部參觀受嚴格人流管制，冬季遇上冰雪封閉。能否順利「登船」，要視乎天氣同緣份。
姣姐講多句：一個80歲嘅建築史學家，冇橋冇墩，就係用幾條鋼索同自己嘅「奇想」將嘢吊喺半空。呢個就係「認真做一件荒謬事」嘅極致示範。
黃姣姐整合｜頂硬上
