日前，日本X（前推特）上一位暱稱「おと」嘅網民發文，批評近年動畫中越來越多少年角色改由男性聲優配音，引起日動漫迷大論戰。
以往日本動畫慣常由女聲優為少年角色配音，原因一方面係青春期少年嗓音較高，女聲優較易模仿該特質；另一方面若用真正少年，又會受變聲期、課業同工作時間限制。經典例子包括《航海王》魯夫（田中真弓）、《鋼之鍊金術師》愛德華（朴璐美）、《名偵探柯南》柯南（高山南）。《鬼滅之刃》灶門炭治郎則係少見兩性混用——年幼時由女聲優佐藤聰美配，長大後改由男聲優花江夏樹接手。
「おと」嘅帖文迅速引來兩極化回應。一方認為女聲優嘅少年聲線係聲優界一大亮點，變聲後男性無論多努力模仿都顯勉強，擔心風潮會摧毀呢種特色。另一方認為由男配男本就自然，而且近年男聲優聲線範圍變廣，受眾同步擴大，係好事。
另有網民認為呢風潮實為針對宅女嘅行銷策略——男性聲優配男角較受宅女歡迎，周邊商品消費力又強，製作方自然看準。亦有觀點指係因《鬼滅之刃》原作者要求採用男聲優而成功，業界只是跟風。
另有網民提醒，現行深夜動畫以小男孩作主角嘅已經減少，專配小男生嘅年輕女聲優亦較少見。亦有評論認為若男聲優聲線與角色不合，觀眾自然會覺得奇怪，關鍵始終係「配不配」而非「男或女」。
姣姐講多句： 呢場論戰表面係技術辯論，其實反映聲優產業正由「技術模仿」過渡到「角色塑造」——聲優唔再係單純配像，而要同角色一起活。對觀眾而言，最關鍵始終係聽得出角色「係個活嘅人」，至於後台邊個喺配，實在唔使咁嚴肅。
