近日有大批周慧敏未經修飾嘅「生圖」喺網瘋傳，隨即引發網上熱議，唔少網民狠批佢「強行扮少女」。對於呢個爭議，前晚（23/10）出席慈善晚宴嘅60歲温碧霞就大方講出態度。
温碧霞表示：「我冇睇到咩新聞，No comment。因為其實……我覺得唔需要介意其他人點睇，做返自己囉！我都覺得佢其實 Keep 得好好。」被問到若自己遇到負面評價會否感到不開心時，佢好坦然，話已經習慣咗演藝圈嘅各種聲音：「肯定會有人鍾意你、有人唔鍾意你，唔可能全部人都講你好。所以我覺得冇所謂，自己開心就得喇！」
同一晚，佢以一身優雅造型亮相，瞬間成為全場焦點；除咗為慈善出力外，仲喺現場展出親自設計嘅大象擺設，展現多才多藝的一面。
被問到點樣凍齡有術，温碧霞大方分享：「最緊要係開心，開心好緊要！要保持住好多 Dream，同埋工作又有滿足感。」佢透露每日都會做運動，最少半個鐘，尤其鍾意做瑜伽；化妝前會先敷面膜，平時亦會到美容院做 Spa。佢笑言冇特別計算每月護膚花幾多，最重要係效果好。
姣姐講多句
「強行扮少女」呢種審判根本係套雙重標準——男士60歲梳個清爽髮型叫「精神」，女士妝扮得精緻就係「扮少女」？社會對成熟女性嘅外表似乎總有條隱形刻度：著乜、扮幾靚、幾凍齡，樣樣都要按年齡對表。温碧霞自己都60歲，仲要凍齡有術，正正係唔向任何一個「年齡刻度」交卷嘅示範。
60歲仲喺舞台扮靚女、每日做瑜伽、自帶Dream嘅温碧霞，可能係呢單「生圖」風波入面最有力嘅回應：開心係自己嘅事。
黃姣姐整合｜頂硬上
