Apple最新款摺屏手機iPhone Duo，賣點就係個「納米紋理玻璃（Nano-texture Glass）」技術，話利用磨砂啞光面將摺痕「隱惡揚善」收埋。點知呢個月有香港連登討論區（LIHKG）網民由網上短片發現，張所謂「納米玻璃」其實只係一張Apple原裝「高級磨砂芒貼」，貼喺超薄柔性玻璃（UTG）表面。徒手一撕，中央鉸鏈位即刻現出兩道深陷反光嘅凹槽，摺痕露形。
Apple：唔好自己撕
Apple官方跟住發提醒：如果消費者自行「徒手撕膜」撕下原廠覆蓋層，導致螢幕損壞，原廠保養即時失效，仲要自付HK$8,749修理費。換整塊內螢幕都係呢個數，但如果只係表層磨損，到Apple Store換張原廠新膜，只需數百元。
工程上點解要貼膜？
蘋果「納米紋理」喺Pro Display XDR或iPad Pro上面，係直接喺硬質玻璃表面做物理蝕刻；但摺機內層係厚度只數十微米嘅UTG，太薄太脆，冇法直接蝕刻。所以蘋果將納米微結構壓印喺柔性聚合物薄膜，再貼喺UTG上面，呢做法話改善量產良率、磨砂漫反射淡化摺痕，有YouTuber仲話張膜帶來紙張式微阻尼感，用手指寫起嚟有紙張手感。
網民怒轟「呃錢」
理性分析壓唔住消費者怒火。網民主要反對：一係畫質變差，Retina對比度、黑色泛灰、畫面有「油膩感」；二係磨砂層硬度低（約2H–3H），指甲印、塵粒都留痕，幾個月就磨損要換；三係宣傳用詞落差——預購時以為係突破性柔性蝕刻玻璃，拆解先知道係一張可撕除塑膠貼膜。
貼膜唔係蘋果獨家
喺柔性螢幕貼保護膜，其實係整個摺疊機產業行之有年嘅標準做法，三星Galaxy Z Fold / Z Flip、華為Mate X、榮耀Magic V出廠都有呢層高延展性保護貼。講到底係iPhone Duo話題性十足樹大招風，事件先至被無限誇大。
姣姐講多句：呢單最有意思嘅，唔係蘋果「偷工減料」，係消費者預期同產品現實之間嘅落差。蘋果「納米紋理」喺硬玻璃上蝕刻係真，喺摺機上變成一張膜都係真。買新機前，最好搞清楚個技術究竟喺邊個部件上面。
黃姣姐整合｜頂硬上
