東京嘅日本皇居，嗰個天皇住嘅地方、成個東京權力圈嘅核心，而家竟然要開賣咖啡。新設「大手休憩所」11月3日開幕，總經費75億日圓，兼充觀光據點，屋頂露台仲可以俯瞰以往只能喺地面向上望嘅石牆城樓。
呢座木造單層建築總樓地板面積2800平方公尺，坐喺皇居東側、貼住地鐵大手町站，9月下旬拆咗施工圍籬後先露出面目。咖啡廳由專營咖啡連鎖店「猿田彥咖啡」負責營運，主打只喺皇居先飲得到嘅原創咖啡同餐點；館內仲有屋頂露台，以前只能喺地面向上望嘅皇居石牆同城樓，喺上面俯瞰會係另一個角度。
呢度唔止係吃茶地方。大型螢幕會播日本各地景點，包括熊本阿蘇草原同廣島宮島，仲有觸控面板介紹皇室稻作、雅樂同歷代天皇；附設商店賣皇室設計嘅工藝品。掃QR Code仲可以查詢前往各觀光地嘅交通方式。官方話，呢度同時要擔當「日本國內觀光據點」。
錢邊度嚟？75億日圓，出自俗稱「出國税」嘅國際觀光旅客税。日本對出境旅客不分國籍每人收3000日圓，呢筆錢專門撥嚟升級觀光設施。宮內長官黑田武一郎喺例行記者會話，目標係「提升來園者舒適度，並強化皇室及傳統文化資訊提供」。
硬蕉抽兩句：成個皇朝權力中心用75億日圓開間咖啡廳，聽落好滑稽，但細心睇，呢個係用消費同觀光去柔化皇權形象嘅操作。皇居過去係權力象徵，而家變成掃描QR Code查交通、買皇室周邊嘅「文化景區」——同某些地方開「博物館式」政權展示中心嘅套路，有幾分神似。咖啡好飲唔好飲，開張先知。
硬蕉哥整合｜頂硬上
