有片｜何文田貨車未關尾門行上窩打老道 網民：跌嘢落嚟分分鐘死得人
無論係貨車嘅尾門定尾板，司機行車前都應該確保已閂好，否則真係會出意外。網上駕駛群組近日有段18秒影片，顯示喺何文田窩打老道往油麻地方向行車嘅密斗貨車，行車途中尾門竟然冇關，從外面清楚望到貨斗內有唧車、發泡膠箱、貨物同木製卡板。貨車行過不平路段時，裏面嘅嘢明顯輕微晃動，好險冇嘢跌出車外。
網民睇完大讚危：「跟佢尾好牙煙」、「一個轉彎啲嘢就會跌晒出嚟，到時認真危險」，更有人直接話「跌嘢落嚟或者俾隻門打中，分分鐘死得人」。亦有人建議其他駕駛者遇到類似情況應該「響咹通知佢」，千祈唔好跟車太貼。
不過有人覺得未必係忘閂，質疑司機係為求方便：「左右門有門繩扣住，唔似唔記得」、「睇兩邊後鏡一定會見到，所以我覺得係好近下一個點，扣實兩邊門算」。有人提醒，即使佢認為鎖住兩邊門就穩陣，但貨品冇固定好，隨時會跌，後車煞唔切撞埋去就大件事。
根據《道路交通(交通管制)規例》第57條，司機須確保任何負載物已適當地固定在車輛上，任何人無合理辯解而違反，首次被定罪可被處以第2級罰款（5,000元）及監禁3個月，再犯可被處以第3級罰款（1萬元）及監禁6個月。
姣姐講多句：呢種真係唔好睇到就淨係按「讚」，遇到就響咹提醒，係真係為他人安全，唔係多管閒事。
