北海道近日出現一宗「熊版越獄」：本地農民為擋熊隻裝設防熊電網，一頭熊見嚟唔掂，轉身喺電網下方掘埋一埞泥土，只花幾秒鐘就鑽入農田，大搖大擺飽餐一頓之後，再鑽返出口離開。最要命係喺度「觀摩」嘅，仲有兩隻小熊，全程坐喺度偷師。
專家話，熊嘅學習能力相當強，一旦喺農田嚐到甜頭，可能回轉頭再嚟食，甚至學識破解電網。換句話講，呢次唔係偷吃，係一課免費師徒傳承：師兄挖埋地道，徒弟坐低睇住，學完就照做。日本農民防唔防得實係要打個問號。
呢單唔止係「熊嘅技藝問題」。NHK 分析北海道約 1600 筆熊出沒通報，發現熊嘅活動範圍一直由偏遠山區、農田向外擴展，喺市區都已經有目擊紀錄，全日本各地市中心都頻繁出現熊嘅蹤跡。上月底北海道仲發生過一宗「熊拍擋風玻璃」事件：一頭熊突然喺路旁竄出，一巴掌拍喺行駛中車輛嘅擋風玻璃上，嚇得車內乘客連連驚呼。
資料圖片：Pixabay
數據方面，今年截至 10 月 19 日，全日本已有 74 人遭熊襲擊受傷，當中岩手縣 12 人、福島縣 11 人、秋田縣 9 人。NHK 話，隨住冬季逼近，熊隻正大量取食準備過冬，加上各地又係豐收祭，目擊事件恐仍會繼續出現，呼籲民眾提高警覺。
硬蕉抽兩句：熊挖地道，聽落似係技術活，但其實係傳統防護嘅「系統漏洞」——挖就搞掂，冇 patch。更恐怖嘅係呢個「漏洞」有兩名實習生在現場錄製教學。傳統電網對住識挖地道嘅熊，基本上係個 open source 嘅設計缺陷。日本想解決呢個「熊害問題」，恐怕唔係多加幾層鐵絲網就搞掂，而是要喺系統層面重新設計。
硬蕉哥整合｜頂硬上
