有網民近日喺Threads發相，話目擊有公屋住户搬遷，睇住對方家俬雜物逐件搬落樓，點知堆貨入面竟有一件用半透明膠袋包得好好嘅「神器」——一個大型夾萬，目測仲新簇。帖文一出，即刻有人高呼「公屋富户」，引來全網激辯。
相片顯示，該住户將置物架等大型家俬雜物擺喺電梯旁地上，當中最醒目嘅就係嗰個巨型夾萬。有網民笑指「呢個保險箱咁大，擺一千萬港紙嘅美金應該都擺到」，又有人直言「太多人大陸有樓有舖收租，住公屋，房屋署有心調查，一定有1/10公屋人即走」。
不過反應明顯分兩派。舉報派叫陣「見到月餅罐（夾萬）一定要舉報」；但另一邊啲人就冇咁嚴肅，有人反問「有冇可能其實入邊得幾萬以下？冇超過」，更有人自嘲「如果我話我屋企個保險箱係用嚟鎖iPad、遊戲機、電話，防止小朋友偷玩～會唔會俾人笑」。
最搞笑嘅係有網民根本唔想理，話「人家都搬啦！搞咁多嘢做乜？」，又有人揶揄「我想睇下你點去舉報佢，等緊食花生」。
講到「公屋富户」政策，政府近年一直嚴打濫用公屋。根據新政策，家庭入息超限額兩倍但不高於三倍，須繳交2.5倍租；超三倍但不高於四倍，須繳交3.5倍租；超四倍但不高於五倍，須繳交4.5倍租；入息超五倍或資產超100倍，則須遷出單位。
首批受政策影響嘅住户已於去年10月進行過一輪申報，若入息超額，須於2026年10月1日起交新租金。
姣姐講多句：一個夾萬就等於「公屋富户」？萬一入面真係淨係鎖住幾本舊雜誌同埋一張黑膠唱片呢？喺呢個「有夾萬即有罪」嘅年代，住公屋仲敢放保險箱，其實係一種極大嘅勇氣——或者，真係得幾萬蚊，係小朋友嘅積蓄。
黃姣姐整合｜頂硬上
