喺小紅書，有港漂女生最近連發多帖，聲稱自己「雖然來香港幾年，還是吃不慣香港豬肉」。佢話煲湯燉湯食唔出，但清蒸就「有很大一股騷味」，更直言試過有次滾豬肉粥，「最後一整鍋粥沒要」，即係話整鍋倒咗。
呢位港漂女仲補充，自己買過價格較貴嘅黑毛豬都一樣有味道，試過「一天吃香港豬肉，第二天去深圳吃深圳豬肉」，結論係深圳豬肉「好吃好多」。佢老家廣東惠州嘅豬肉「沒什麼味道，好好吃」，仲順帶呻咗香港冰鮮雞同本地雞蛋都「難食」，而家專食日本蛋。
最有料嘅係佢話有次去買「豬里脊」，豬肉佬話冇得賣，「大陸才有這種叫法，香港的叫肉眼」，佢仲話「也不知是不是豬肉佬騙我」。後來有網民解釋：內地小里脊喺香港叫豬柳、大里脊叫肉眼，澄清「豬肉佬」冇騙人，係兩地叫法唔同。
呢帖一出，內地網民留言反應兩極。有貴州人話「香港的豬肉無敵難吃，不香，處理了都一股味道」；有福建人話「我來香港也這樣煮，就是不好吃，我媽説你那邊豬肉不好吃！」但亦有網民坦承「可能是我舌頭夠遲鈍，沒吃出異味」，另有網民建議「一般會用葱薑料酒過一下，這樣味道會小很多」。
講到科學層面，所謂「騷味」喺國際食品科學上有正式名：公豬異味（Boar Taint），源於公豬體內嘅雄烯酮（Androstenone）同糞臭素（Skatole）。研究顯示，人類對雄烯酮嘅嗅覺敏感度有基因差異，部分人極度敏感，微量都覺得刺鼻。傳統上公豬會喺幼年閹割去勢抑制呢個味道，但如果養殖場閹割不完全、出欄週齡偏大，或者個別豬隻脂肪氧化，都會殘留明顯騷味。
根據食物安全中心資料，全港鮮肉供應來自上水及荃灣屠房，每日共屠宰約3,072頭豬；港人食嘅豬隻會先被電暈、刺穿放血，再經食環署衞生督察檢驗合格，先由運肉車運往店舖。
姣姐講多句： 「整鍋粥倒掉」呢個畫面好有戲。食乜都係好個人嘅事，有人食出騷味、有人食出人情味，舌頭同鼻都屬於自己。但豬肉佬真係冇騙你，「豬里脊」喺呢度就係「肉眼」，唔好以為個叫法變咗，世界就變咗。
黃姣姐整合｜頂硬上
