秀茂坪邨一位住户，最近因為單位成員減少，變成「寬敞户」，需要交還公屋單位。9月23日，大廈主任同物業管理人員上門做退還前檢查，逐一評估單位設備有乜要還原。其他改動佢都接受，唯獨鐵閘呢項，主任話要自費處理，報價4,010元。
呢個鐵閘，係佢2005年申請自費換嘅。當時佢話，舊鐵閘下面有個窿，手伸入去就開到，而且兩家鎖匙互相試過，都開到對方嘅門。屋企有老人家日日提心吊膽，為求安心，佢先向房署申請，將原本嘅鐵閘改成趟閘。房署職員審批後喺文件上簽了字，證明改動合乎規格。
份批准文件寫得清楚：如果更換後嘅鐵閘符合房署指引，租客搬走時唔使將鐵閘換返原裝，鐵閘歸房委會；如果不符規定，就要自費糾正。
問題就係，上門嘅主任睇完份2005年嘅文件，依然堅持要佢還原。佢嘅講法係：「文件叫我唔使還原，但文件冇叫我唔使畀錢。」
呢個邏輯，連住户自己都聽懵。佢覺得太离譜，於是喺網上分享經歷，問有冇人聽過呢種講法。網民反應唔少，有人話呢種講法純粹係亂嚟，白紙黑字都俵打橫嚟講，好離譜，一定要據理力爭。有人分析，文件分兩條款，符合規格就唔使還原，唔符合先要自費糾正，分開寫正正表示合規嘅話就唔使畀任何錢。
結局大反轉：房署其後致電，話揾返咗2005年嗰份舊文件，鐵閘唔需要付費還原。房署正式回應指，9月23日上門檢查時，職員發現單位鐵閘已唔係原裝，提醒住户可能需要還原。住户出示批准文件後，辦事處核實文件內容，並確認鐵閘符合規格、狀況良好，於9月25日回覆：鐵閘無須還原，住户亦無須繳付任何還原費用。
姣姐講多句：呢單嘢真係笑到想落淚 😂。21年前房署職員簽咗份白紙黑字，而家上門嘅就話「文件叫我唔使還原，但文件冇叫我唔使畀錢」？呢個邏輯都算寫得出？好在結局係大反轉，冇畀佢咁易賺到4,010蚊。記住，自己申請過嘅改動，文件一定保存好。
黃姣姐整合｜頂硬上