風水輪流轉，阿媽煲劇煲過後生

以前總係長輩喺耳邊嘅「少玩手機、眼睛會壞」，如今天水倒流，不少老人家反成短劇同AI短劇嘅重度粉絲，令到仔女成日頭痛。有網民日前喺 Threads 發帖，話佢阿媽近好沉迷AI短劇，引來一大班受同樣困擾嘅網民留言大吐苦水。

「帶阿媽去東京都要煲」

有網民分享自己帶阿媽去東京旅行，「無論搭車食飯，佢都要攞部電話出嚟煲AI短劇」。另外有網民笑話：「係咁睇嗰啲爭老婆爭老公嗰啲，仲要睇埋啲綠茶劇情！」，又話「明明有 Netflix / Disney+ / Prime，都仲係要睇AI片」。亦有部分後生仔被問起就承認：「我睇啲鬼佬AI劇，真係幾好睇，啲男女主角好鬼靚㗎。」

除咗浪費時間，有網民更擔心長輩長時間睇呢啲高刺激影片會影響記憶力，有分享身邊朋友60歲，以前輕微冇記性，如現在正講兩句就唔記得自己講緊乜，「好大鑊！」。

網民破解奇招：反洗腦演算法

有網民獻計：「幫佢 Follow 超多大隻健身教練或者煮飯 Channel，每條片都比 Like。」又有人話：「Del咗個App佢，幫佢轉 Apple / Android Account，以後下載嘢要你入密碼。」亦有人直言：「冇，塞住自己對耳好過。」但網民普遍認為，比起其他不良嗜好，煲劇已屬相對安全嘅消遣。

22萬部短劇，爆款率不足0.5%

據內地數據分析平台 DataEye-ADX 統計，2026年上半年全網共推出超過 22.19 萬部AI短劇及AI漫劇，播放量突破1億嘅作品有1055部，爆款率不足0.5%，超過九成作品乏人問津。范冰冰日前喺釜山影展提到自己睇過大量AI短劇，批評同質化嚴重，「影片裡演員的臉都長得差不多…… 覺得現在的年輕人吃得不太好」。

楊聰財：三大上癮主因

明知AI角色生硬、劇情浮誇，點解長輩都睇到癲？台灣精神科醫師楊聰財指：

  1. 密集刺激多巴胺：幾秒一個背叛、復仇或暴富高潮，低等待、高刺激節奏能迅速觸發多巴胺。長者對日常感受力降低，短劇成為最快嘅情緒刺激來源。
  2. 情感投射與寄託：退休同社交圈縮小令長輩孤獨，「逆襲、團圓、善惡有報」題材正好填補心理空虛。
  3. 欠缺AI鑑別經驗：長輩對AI生成內容缺乏概念，容易將虛構內容信以為真。

姣姐講多句

以前「少睇電視多去運動」係大人叫後生，而家後生要幫阿媽「反洗腦演算法」，呢場代際戰爭打得好慘。有網民話煲劇算安全消遣，呢句話聽落都有道理——比起賭波或買股票，煲部AI短劇都算健康，就算主角面部都記唔住嘛。