近日有網民喺 Facebook 群組「Carers Voice照顧者大大聲」發文，講自己出錢買樓畀八旬父母安老，獨力照顧半年身心俱疲，向兄姐求分擔，反被移英家姐鬧「淨係識放負」，姐夫落井下石叫佢「有病就去睇醫生」。
樓主排行最細，23 歲搬走自立，27 歲買樓，連父母原先住嘅公屋都係佢十幾年前買落。今年初佢特登出資換買自己住所附近嘅私樓方便照應，點知「阿爸住咗入去一個禮拜就不明原因出現瞻（譛）妄症」，母親本身好倚賴父親，搬入後「無論身體定係記性都非常之差」。
過去半年佢生活徹底失衡：適應新工作、出入醫院、轉工、幫父親申請綜援又上訴、排老人院、幫母親申請社區券陪診、請工人，全部一人硬食。母親更天天「奪命連環Call」，小事都要問佢。
對比之下，大哥一個禮拜探父一兩次；家姐「全家 5 年前移英」，喺父入院後「返過嚟一次兩個禮拜」。其餘起居、維修到聯絡社工，全由樓主一人攞。
佢其實早向家人訴苦，反被話「好負面、淨係識呻」。日前忍無可忍喺家庭群組要求兄姐正視責任，結果家姐反斥「成日放負」、姐夫「有情緒病就去睇醫生」，阿哥阿嫂全程已讀不回，令佢情緒崩潰。
帖文即時引起熱議，大批網民狠批兄姐係卸責：「你估佢哋諗唔到咩，你唔具體講，佢哋扮傻咋」、「結咗婚生咗仔唔係大哂」、「父母大家都有份，理應乜都除 3 份」。有過來人話「阿哥家姐包括阿爸阿媽講到底都係食住你」，「當成係應份，連多謝一聲都無」；亦有網民直言「係外國嗰位就唔該爽手比錢」，建議「將兩老每月日用開支轉網購成條 link 叫佢哋俾錢」，更勸樓主「你嘅人生自己先至係第一順位」。
姣姐講多句：照顧老父母從來唔係「最細嗰個」一個人嘅事，移居海外唔代表可以抹掉家庭責任。呢個案例點出嘅，係孝養同家庭責任嘅雙重標準——出錢出力嘅被鬧「放負」，坐陣觀望嘅得個默不作聲。
黃姣姐整合｜頂硬上
