清減咗一圈嘅張敬軒，呢日亮相 TVB 節目《飛常好聲音》擔任評審，順帶接受傳媒公開訪問，都算係佢自急性內耳迷路炎康復後首次公開露面。佢坦言耳疾七月已經好，亦笑話已經開咗兩場演唱會，「相信冇任何手尾要跟」。
被問到點解瘦咗咁多、結實手臂仲喺唔喺，佢笑言「唔知依家係咩興薄肌男丫嘛，我就算食大隻奶粉都無用，由細到大都係瘦底」。又被問到係咪因為有身型所以貼半祼泳照，佢話自己「久不久有分享」，加上年輕時喺美國當地陽光好，所以去游水曬太陽；惟要趕演出怕感冒，不敢四圍亂走，「我場 show 買到去四千幾蚊一張飛，我個狀態一定要好！」
講到 IG unfollow，佢透露自己有開工作、私人兩個帳號：「我工作一個帳號，私人有一個帳號，我覺得 Social Media 轉咗玩法，工作嘅嘢同私人嘅嘢要分返開會好啲。」被問到還 follow 唔 follow 王菀之，佢即答：「我一路都有 follow 佢啊！係丫！」並補充私帳上玩得幾開心，「私人生活來往比較多嘅人，就轉落去私人帳户嗰度」。
圖片：Tombus20032000／CC BY-SA 4.0／Wikimedia Commons
王菀之近來有舞台劇上演，佢話 1 號已購票支持：「有時我真心去支持㗎，不過唔係去睇佢咋！我有睇阿 Dee、阿聰，佢嘅 show 係唔可以錯過嘅！」佢又話唔會公開私人帳號，坦言「我而家好享受喺個度活動自如，乜都 po 下」，笑言「出賣就唔會係朋友」，並坦白話入行廿幾年「越嚟越冇圈外嘅朋友」，大家有默契知道乜嘢該講、乜嘢唔該講。
對於網民好懷念以前喺 IG 上嘅張敬軒，佢笑言將會重出江湖。
姣姐講多句：明星開兩條 IG 早就唔係新鮮事，有嘅晒開、有嘅玩埋，重點係「unfollow」唔代表斷交。一個講開「食大隻奶粉都無用」嘅男人，喺鏡頭前面自曝「由細到大都係瘦底」，呢種自黑式直白，唔使開第二個帳號都照樣活得活動自如。
