因《中年好聲音3》評判身份爆紅、被網民封作「音樂女神」嘅海兒（Hillary），日前喺新城知訊台節目《放飯 ICU》大方拋開優雅包袱，自爆一段16、17歲時嘅叛逆往事：佢曾瞞住父母，從媽媽夾萬偷走護照，私下飛去台灣。
佢透露，自己由細家教極嚴，連屋企匙都冇得攞。到了叛逆期，佢想跟同學去野外露營，其實係藉口，私下直接偷飛台灣玩到盡興。到最後一日，媽媽發現銀包唔見，入面有一張片咭片，打咗畀爸爸。
「返嚟鬧咗我一輪就冇出聲，我覺得仲恐怖，寧願佢哋打我。」海兒笑言，父母最終話：「算喇，知道你好鍾意玩，以後你想去玩就畀你去玩，但你至少畀我知，至少你死咗喺邊我都揾到條屍。」呢句「揾到條屍」據佢講，係佢最難忘嘅「恐怖」迴應。
除咗偷飛台灣，海兒亦首度公開一段早年演出崩潰：一次大型流行音樂演出，佢因冇經用過監聽喇叭（Monitor），上台後完全聽唔到自己聲音，只可硬著頭皮唱完。一落台就崩潰大哭，對工作人員放狠話：「我以後都唔唱流行曲了，我要留喺歐洲唱 Opera 算！」佢指經過兩三年磨練，而家已經重拾信心。
海兒亦提及入行過程，十分感激同門師兄張敬軒嘅提攜。佢透露張敬軒借出私人工作室畀佢練舞練歌，並親手調音響。張敬軒送佢一句金句：「無論發展成點，做完嘢返到屋企，你永遠都只是一個普通香港市民，唔好當自己係星。」
姣姐講多句：女神自爆偷護照私逃，本身已經夠大花生，最勁係父母冇開罵，反而一句「死咗都要揾到條屍」反殺全場，呢種冷到極點嘅港式家庭教育，比任何爆粗都恐怖。想偷嘢出街，先問嚇屋企有冇鎖好夾萬。
