歌手兼牙醫許廷鏗（Alfred）最近上 YouTube 頻道 MinatoTV 嘅節目《酒精路跑》，微醺之下化身「凱婷鏗」狂搞爛 gag，同埋分享護牙知識。片段中佢罕有地細講起喺街頭被市民攔下要求合照嘅一次經歷，話要大家同藝人「互相尊重」。
佢話其實被要求拍照都「歡迎，影相有乜所謂啫」，不過有次落電梯時，後頭有個男仔突然問可唔可以同佢影張相，佢話得啊，不過要落咗電梯先，因為「危險呀」。去到地，佢再問對方係咪想影相，對方話係，「可唔可以擺上網？」
許廷鏗話嗰日佢放緊假，所以婉拒，但對方隨即話：「咁我唔擺得上網咁我影嚟做乜？」佢最後就答「咁你唔好影啦」。
許廷鏗喺節目中話，明星喺街度俾人撞到影張相唔算乜，周潤發都成日俾人撞到，但「影完張相人哋嗰日狀態唔係真係好好，唔想擺上網咪唔好擺」，大家應該互相尊重。
許廷鏗2009 年入 TVB 第一屆《超級巨聲》嶄露頭角，2011 年橫掃四大電子傳媒新人獎，其後憑《螞蟻》、《面具》、《青春頌》等大熱歌穩坐實力派位置。2020 年佢首奪「叱吒樂壇男歌手金獎」，2021 年創立個人獨立品牌「自許紀錄」，正式自立門户。
姣姐講多句： 呢次唔係鬧星仔太衰，亦唔係路人太癲，真係「社交網」三個字鬧嘅。而家攔住先問「可唔可以擺上網」，好似影一張相就係攞份素材咁，唔擺上網就等於白影。名人同普通人嘅關係，被平台改寫咗。想影就影，想唔影就唔影，想擺上網就問人，唔想擺就唔使強求。尊重對互相嚟都應該。
