42歲向佐（向華強同向太陳嵐嘅長子），近日喺內地綜藝節目《大哥小助理》同胡軍、李乃文分享健身經驗時，自爆了一段「大隻嘅代價」：當年為求快速練成一身的肌肉，佢長期將蛋白粉沖得極濃、每日攝取量遠超正常標準，結果腎臟功能一度衰退至七十幾歲老人嘅水平。
向佐原話：「因為濃的蛋白粉很傷腎，我就是這樣，貪方便、貪快，貪他濃縮，我就有一段時間腎不太好，直接走路都有問題。」佢仲指，去醫院檢查時，「醫生説我的腎像七十多歲的腎，真的。」
呢個其實並非第一次曝光。早喺2019年，向佐同郭碧婷參加內地真人騷《我家小兩口》做婚前檢查時，醫生已診斷佢腎功能相當於70歲長者。向太當日指，係因為兒子習武、長期高強度訓練，導致手腳、膝蓋多處受傷，肩膀曾脱臼三次，半月板更要做手術取出三分之二，再加上長期服用止痛藥所造成。
呢次向佐願意公開自己呢段慘痛經歷，佢話想以親身經歷提醒健身一族：唔好盲目追求速成、超量亂食補充劑，以免對器官造成無法挽回嘅傷害。
姣姐講多句 肌肉係練出嚟嘅，唔係飲出嚟嘅。貪快、貪方便，結果「大隻」嗰個變成「七老八十」，呢個反差真係好真實。補充劑只係補充，唔係主糧，更唔係「越濃越勁」。想健身先問教練同營養師，唔好自己亂沖亂飲，腎冇得換。
