杜如風（Helen To）日前作客方健儀嘅 YouTube 節目《女人方言》，罕有公開多講嗰個跟蹤自己好多年嘅標籤。佢話被網民封「世界級港女」之後，「完全冇人追過我，我單身咗12年。就係因為呢個名囉。所以我覺得好冤枉。」
呢個標籤點嚟？源於佢主持旅遊節目時展現嘅豪爽揮霍、對名牌及購物嘅熱情，甚至曾自爆「屋企有一千對鞋」，招致部分網民批評節目空洞、鼓吹物質主義。杜如風過往多次平反，強調自己「從未花過男朋友錢」，買名牌全憑自己努力工作賺錢，但佢笑言平反無效，污名照樣扣住，「不過我唔會影響到我買嘢。」
講緊買嘢，佢話近年心態確實有變：「講真嘅，而家買嘢真係睇價錢喇。以前真係唔睇嘅，如果而家鍾意咗一樣比較昂貴嘅物件呢，我會返去畀3日時間自己諗，如果3日之後，你同埋好想要嗰樣嘢呢，咁就買啦。」呢個轉變，佢話跟多年前搬回家同媽咪同住有關，一次執家捐咗30幾袋未拆牌嘅衫，「嗰下我就覺得，原來真係太多。」
感情方面，杜如風早喺 J2 節目《數你條命》大爆過情史，話遇過嘅「渣男」一隻手數唔完，包括一位令佢一度以為自己係「正印」嘅隱瞞高手，但她話呢啲經歷未影響佢：「知你渣嘅喇，咪同你玩一陣先。我對愛情都係好嚮往嘅……但係如果無呢，自由自在嘅單身生活呢，我都好 OK。」
最矚目嘅係身形——佢由圓潤變咗外界話嘅「紙板人」。佢試過不同減肥方法都失敗，甚至一度打算放棄做肥妹買男裝大碼，但今次竟然成功：「呢次係還原基本步：節食、做運動，一日三隻雞蛋。仲有一餐晏晝嘅，有半碗麵食到嘅，跟住就喺個跑步機度跑。我而家105磅，好滿意，夠喇，唔好再瘦喇，再瘦落去就殘㗎喇。」
姣姐講多句：一個女人被網民貼埋「世界級港女」嘅膠紙，貼住12年，平反冇用、無人追、仲要自己洗，呢個係真係冤。但杜如風最屚嘅地方，係佢冇自殘、冇閉嘴、冇停止買衫，反而把12年嘅委屈笑住講出嚟，再用最簡單嘅「一日三隻蛋」證明自己嘅意志。標籤係網民貼，人係自己過。
