黑龍江一輛私家車疑閃避其他車輛時失控，直撞路旁一幢民居外牆，牆身嚴重龜裂。最離譜嘅係，撞嘅正正係一面寫住「南牆」兩個大字嘅牆，令呢宗普通交通意外，一秒變身「不撞南牆不回頭」嘅現實版。

事故當日，涉事私家車正沿道路行駛，期間疑為閃避其他車輛，突然偏離原有行車路線，猛烈撞向路旁民居。巨大衝擊力令原本完整嘅牆身瞬間出現明顯裂痕，車輛亦嚴重受損，現場一片狼藉。而撞嘅正正係寫住「南牆」嘅外牆。

網民玩到「物理驗證」

畫面流出後，留言區一片歡騰，有人調侃：「這下真的撞南牆了！」、「都寫在牆上了，還是躲不過」、「南牆：我都已經提醒你了」、「這不是迷信，是直接物理驗證」、「南牆倒了，維修費也來了！」成個俗語突然獲咗一次字面意義嘅認證。

屋主秦先生：太巧合

遭撞民居嘅屋主秦先生表示，事發時突然聽到一聲巨響，立即衝出屋外查看，先至驚覺有私家車撞上自家外牆，整幅牆身幾乎被撞裂。秦先生初步估計，修復受損牆身需要約2萬元人民幣（約2.3萬港元），面對呢宗突如其來嘅意外，加上外牆恰巧寫有「南牆」二字，佢直言事情實在太巧合。

幸好，事故雖造成私家車及外牆嚴重損毀，但車內3人均無大礙，未造成嚴重傷亡。

硬蕉抽兩句

「不撞南牆不回頭」呢句老話講咗幾百年，一直係一種抽象嘅哲學警告。今次黑龍江呢位車主，竟然用一輛私家車幫人做了一次直接、暴力、又可以計錢嘅物理驗證。

呢下真係「不撞南牆不回頭」，仲要「回頭修牆」，真係夠硬。

硬蕉哥整合｜頂硬上