時裝店MOISELLE太子爺陳柏熹（Harris）昨晚喺中環補辦39歲生日慶生晚宴，同父母陳欽杰、徐巧嬌一齊切蛋糕，何嘉莉、胡孟青、鄭紹康等好友都有出席。
佢話自己原本生日（10月5日）已跟較 close 嘅好友慶祝過，當晚同場嘅關之琳生日，Harris 順手為佢補祝生日，仲送咗隻手袋畀大美人。有冇關心過對方感情狀況？Harris 即答：「冇喎！真係唔知，我失蹤太耐。不過佢有問我有冇拍拖。」
被問到現階段感情狀態，佢坦白話自己單身；講到擇偶條件，佢話三年前喺深圳不幸遇到意外，「呢兩年人生變化都幾大，咁所以睇定啲」，亦坦言自己對身邊人嘅説話同眼神都變得很敏感。Harris 形容過去休養兩年「好似冇咗」，待恢復狀態時已接近40歲。
據披露，佢2023年8月喺深圳出事，鼻歪、左邊臉顴骨凹陷，事後接受六次手術重建，醫療費超過200萬；今年3月再做第七次手術，佢話對效果感到滿意。
談到發展大計，佢指會喺內地開直播帶貨，現時只任監督，「執好個樣後」會再落場出鏡開 live。
姣姐講多句 有錢有閒嘅第三代，39歲仲要自己講「睇女仔睇定啲」，呢個反差真係好真實。富家子唔代表感情問題可以靠鈔票填平，兩年休養對人嘅影響，真係比想像中大。
黃姣姐整合｜頂硬上
