一名內地女子近日喺小紅書發帖，話佢由吉隆坡飛往廣州嘅航班上，從機窗高空俯瞰，望到漆黑海洋上散佈住大量青色光點，部分仲透過雲層映照出大片光暈。佢形容眼前景象「彷彿路過冥界」、「被震撼到了」。
帖文一曝光就即刻成為網民熱議。有人認真分析：「這些燈意味過度捕撈」、「濫撈濫捕」。最狠一句係：「小時候常常聽到説這些漁火點點覺得很浪漫，老了才明白正確名稱是過度捕撈」。仲有人玩梗：「捉魚的，馬來西亞也有，然後從海邊看，有人會發小紅書：馬來西亞也有極光啦」。
點知呢類景象根本不罕見。美國太空總署（NASA）過往曾發布國際太空站拍攝嘅泰國附近夜間海域照片，畫面同樣出現數以百計綠色光點。NASA 解釋，呢啲光源來自夜間作業嘅漁船：漁民用強光吸引浮游生物同小魚聚集，繼而吸引以佢哋為食嘅魷魚靠近水面，方便捕撈。馬來西亞沿岸都有類似做法，夜間沿海經常見到一排排裝住明亮綠色燈光嘅船隻。
點解會「成片發光」？南海燈光漁業研究指出，大型燈光罩網漁船主要捕捉鳶烏賊（紫烏賊），部分船隻可配備約 500 至 1,000 盞燈，單船燈光功率可達約 200 至 500 千瓦，科研人員甚至可以直接用衞星夜間影像辨認呢啲漁船。有研究估算，喺無月光干擾嘅日子，衞星偵測到嘅南海燈光漁船數量，由 2012 年約 400 艘升至 2020 年約 2,000 艘。由飛機落嚟望，數百艘船同時開燈，加上低雲、水氣同海面反射，光線被雲層散射，就形成相中嗰片「幽綠色雲海」。
南海確係長期存在過度捕撈、非法、未報告及不受管制捕魚等問題，近年研究亦指出當地漁業面對資源過度開發、監察不足，以及部分船隻 AIS／VMS 資料缺失等管理困難。不過「用綠燈捕魚」本身唔等於非法捕魚，是否違法要視乎船籍、牌照、捕魚季節、捕撈區域、漁具，以及係咪進入其他國家專屬經濟區等因素。
據報道，樓主事後將小紅書帖文刪除，惟喺 Threads 保留咗相同內容。
姣姐講多句：見到一片綠光就即刻聯想「冥界」，呢啲係我哋見到乜都要先同陰間對號入座嘅本能。下次喺萬米高空見到類似畫面，記得唔好即刻拜神，先查查航線。NASA 都講晒，呢啲光係漁船。冥界仲未開過 500 千瓦嘅漁光燈。
