《女神配對計劃2》播緊，近三集女神同求愛勇者深入接觸之後，郭珮文（Juliana）喺昨晚（10月11日）社交平台發了一大段感性長文，用最貼地嘅「Three Course Meal」比喻，逐個講明自己同 Kyle（李爾晨）、Ice（俞鋆瑞）、Preston（伍頌曦）三位男士相處下嘅感受。
最靚嘅「前菜」交畀咗 Kyle。郭珮文話同佢互動輕鬆愉快、破冰聊天氣氛極佳，仲讚佢細心到會温柔幫佢整理頭髮。佢直言同 Kyle 相處完全冇壓力，呢種舒服係「美好的初識」，短暫而令人開心，適合慢慢了解嘅新朋友。
最重頭嘅「主菜」，係舊愛 Ice。郭珮文大爆自己 2023 年參選港姐時，正正係 Ice 一直支持同鼓勵，先令到內向嘅佢有勇氣踏出舒適圈，並直接講：「可以説，沒有他，就沒有現在的我。」佢非常感恩 Ice 默默包容兼帶動佢，令佢慢慢敢於社交同表達，更坦言只要有 Ice 喺身邊，就算身處人山人海都即刻平靜放鬆。
至於「甜品」Preston，郭珮文話矇眼遊戲時佢確實希望選中佢，想多認識對方。佢表示同 Preston 係全新開始，難免有少少初識嘅緊張，但能感受到對方嘅真誠，更發現二人嘅價值觀、想法甚至生活習慣都意外地相似，形容呢種感覺就似甜品「甜而不膩」，係越認識越有魅力嘅同頻緣分。
姣姐講多句
將三人擺喺同一張食單上面，有前菜、有主菜、有甜品，仲要每個都用最正嘅詞去讚，呢個「一客三式」嘅周旋術，好過人哋去自助餐打餸，仲有條理。最難得係佢冇玩到最後就講「其實我想喺屋企食飯」，而係認認真真逐個講到點樣同佢哋「上癮」，呢種大方同透明，真係食住飯睇節目都唔好意思打擾。
黃姣姐整合｜頂硬上
