40歲嘅王君馨（Grace）上個月同銀行家老公Daniel到越南富國島JW萬豪酒店享受「Babymoon」，返嚟喺社交平台上載咗一輯喺度拍嘅泳裝孕照寫真，記錄迎接新生命之前嘅時刻。
呢單花生最惹眼嘅，係套寫真入面嗰個「只大肚唔大身」嘅反差。Grace嘅孕肚雖然圓潤飽滿，但手腳依然纖細、臉型保持精緻小V臉，側身照入面腰背同臀部依然有線條，完全唔見「胖到周身」嘅痕跡。老公Daniel更喺度單膝跪地親吻佢孕肚，兩人相擁，甜到齁。
回想到佢去年5月先誕下女兒Audrey，今年7月底正式宣佈懷咗第二胎，實現「三年抱兩」。喺貼文入面，作為虔誠基督教徒嘅Grace亦抒發咗對再次懷孕嘅感悟，寫道對女性身體能夠在子宮內孕育並誕生新生命感到震撼，並稱：「我們的上帝是一位奇妙的造物主，我感到非常榮幸能再次承載生命。」
姣姐講多句：Babymoon呢個詞本身就係「baby + honeymoon」嘅組合，專指懷咗孕去度蜜月。一般產前照拍完就係擺喺家度睇，Grace呢套就係去咗海外度假酒店、穿白比堅尼配透視輕紗認真拍嘅寫真。點樣喺孕肚幾個月後保持呢種狀態，相信好多人都有同感：佢哋嘅基因同飲食，同我哋喺茶餐廳揀餐嘅標準，真係唔係同一個層面。
黃姣姐整合｜頂硬上
