近日有港漂喺社交平台發文，話自己當初求職碰壁都常拿「廣東話講唔好」當藉口，但喺香港實打實生活一段後先覺悟：「粵語只係我俾自己揾嘅一個藉口罷了，真正卡住人嘅係呢啲更現實嘅嘢。」佢力數生活成本、求職焦慮同社交孤獨三大痛點，話真係「喘不過氣」，引起唔少網民共鳴。
第一刀就係開支。佢話隨便去間茶餐廳，「一個頹飯加杯凍檸就要四五十港幣往上」，叫外賣「基本都要七八十起步」；合租細房「租金就係4k起步，細到打開行李箱就基本冇地方下腳」。扣完食水交通存唔到錢，「有時月底睇下銀行餘額，真係會懷疑自己留低到底喺圖乜」。
第二係產業單一、僧多粥少，喺內地攞嘅經驗唔易直接對接，「經常要從頭開始證明自己……面試完返屋，明明好攰，卻瞓唔著，腦子入面全係剛才冇講好嘅嗰句。」
圖片：WiNG／CC BY-SA 3.0／Wikimedia Commons
第三係佢話最難捱嘅「深層孤獨感」：「日常唔太會主動打擾你，真等你開口，又未必接得住。能交心嘅本地朋友，真係唔多。」週末「一個人窩喺房入面，刷緊手機，睇住窗外天色一點點暗落去，都唔知道自己喺堅持乜」。
帖一出討論好熱。有人話廣東話先係最大門檻：「如果粵語、交流呢個門檻過唔去，後面呢啲問題都係難上加難」；但多人認為錢先係核心：「粵語唔係萬能，阻礙融入就係收入」。亦有同感者話：「無論點都係有錢人嘅天下，我打算回去了，文化差太多。」對呢啲聲浪，有網民一針見血：「果然鍾意香港嘅人鍾意到要命，討厭嘅都一樣。」
呢啲就業焦慮唔係空穴來風。根據特區政府勞工及福利局同入境事務處公佈嘅統計，以「高端人才通行證計劃」為例，首屆到期需申請續簽者，實際提出申請嘅比率約54%；順利續簽者嘅行業主要集中喺金融、商貿同創新科技三大板塊，且職位多數要求專業學位並達相應薪酬水平。
姣姐講多句：54%呢個數擺喺度，就話咩「你鍾意港港自然會留低」都冇咁簡單——錢、屋、人哋嘅崗位，先係留低嘅硬條件。廣東話講得好係加分，但始終唔係護身符。港漂要衡量嘅，唔係學唔識講廣東話，而係自己嘅專業同薪酬，喺呢座城中到底有冇位置。
