TVB戀愛真人騷《女神配對計劃2》第8集《女神2》，今個星期日（10月25日）播出，繼續「心跳電話亭」環節：12位「求愛勇者」爭奪同5位女嘉賓喺電話亭內15分鐘單對單相處嘅機會，挑戰「心跳」主題考驗之餘，亦要傾偈增進瞭解。
官方率先放嘅，係「提升心跳達人」陳星妤（Yvette）嘅搶先看片段。呢集Yvette分別獲得李爾晨（Kyle）同伍頌曦（Preston）爭取獨處，而最驚爆嘅位，就係Kyle解釋點解揀Yvette嗰段。
Kyle一開口就揭出二人大學時早已相識，更自爆同Yvette一度「行得好埋」：「我同陳星妤大學就識，有段時間我哋行得好埋，又好似有、又好似冇咁，嗰種感覺係咪叫友達以上、戀人未滿。」聽落去似係大學舊情，原來仲常一齊做gym、一齊拍運動系列social reels，默契十足。
對於Kyle主動出聲想增進瞭解，Yvette大感錯愕，劈頭第一句就係：「你做乜鬼，我好唔慣？」、「你唔係揀到冇人先揀我嘛？」事後接受製作組訪問時，Yvette仲自嘲地講：「佢可能驚我冇人揀，企咗出嚟，我心諗你做乜鬼嘢啫，叉隻腳落嚟阻住我識男仔！」
至於Preston，就係直頭表示想給自己一個機會認識其他女神。
官方雖然未有公開Yvette最終揀邊位，但披露咗佢選擇嘅原因，話對方「年齡大過我少少」「有少少似我廿歲出頭鍾意嘅男仔」，花生指數高到爆。10月25日收住睇咯。
黃姣姐整合｜頂硬上
