TVB戀愛真人秀《女神配對計劃2》近期播出後，網民討論度一直高企，第二季賽制亦重磅升級：除咗打破原有分組、配對隨時重新洗牌，節目今季仲增設「隱藏女神」踢館環節。節目主持林盛斌早前已經預告過有兩位「隱藏女神」會加入戰團，而佢哋嘅身份而家正式曝光——2021年港姐陳星妤，同2022年港姐季軍梁超怡。
陳星妤×李爾晨：舊緋聞再爆
最熱鬧嘅，要數陳星妤同李爾晨呢條線。31歲嘅陳星妤早前因為一段健身室「公主抱」影片，同節目入面嘅「求愛勇者」李爾晨傳出緋聞；而陳星妤一加入，就同李爾晨喺節目中驚喜同框，舊事即刻再成為焦點。據報兩人最終會成功配成一對。
同時，節目中另一位女神郭珮文，喺早前播放的一集中放棄咗前男友Ice，首輪竟然揀咗李爾晨做「飯腳」，二人仲有撥髮、貼面等親密互動，話題不斷。加上前男友Ice本人現身，李爾晨同郭珮文嘅曖昧、同陳星妤嘅舊緋聞，再加埋Ice，搞成錯綜複雜嘅四角關係。
梁超怡：加入即出局？
另一位「隱藏女神」梁超怡，早前曾捲入蔡卓妍（阿Sa）同石恆聰嘅戀情傳聞，一度被指係「第三者」，其後佢自己澄清，雙方只係朋友。據報梁超怡今次加入節目，會喺淘汰環節遺憾出局。
姣姐講多句
打破分組、加入隱藏女神、配對隨時洗牌，TVB今季《女神配對計劃2》真係玩到盡。表面上係配對節目，實際上係女神之間嘅心理戰。郭珮文放棄前男友改揀「飯腳」，真係全劇最精彩嘅轉折；陳星妤同李爾晨嘅舊緋聞最終會唔會「落地」，就等後幾集再見分曉。
黃姣姐整合｜頂硬上
