Gigi 炎明熹20日喺社交平台放咗一段自彈自唱《在搖搖板上相對的我們》嘅clip，帖文寫住「希望我兩個男朋友唔會覺得關係不對等，仲要我錄到頭髮亂晒佢哋都冇嫌棄」。一腳踏兩船？唔係——佢嗰兩號「男朋友」，支支係木結他。

最盡嘅係佢仲上限時動態，逐隻介紹：「同大家介紹番男朋友1號」、「男朋友2號」，當佢真係拍緊戀。講起「頭髮亂晒都冇嫌棄」，聽落又幾sweet，因為結他唔會同你傾偈，更唔會嫌你。

姣姐講多句，呢種把樂器當另一半嘅深情，比好多人身邊嗰個都誠實。

黃姣姐整合｜頂硬上