有傳現年35歲嘅鄧紫棋（G.E.M.）已經同拍拖8年嘅富二代造型師男友Mark Ngai（魏俊傑）喺紐約一間教堂低調完婚，而消息指由男方親友口中傳出，令婚訊傳聞甚囂塵上。
呢單傳聞最耐玩嘅地方，唔係「佢哋又結婚」，而係公司今次嘅回應。2020年曾傳二人喺泰國海島行禮，當時經理人第一時間「大動作打臉」，笑稱傳聞「實在太好笑」，話大家「不用恭喜」；2022年又傳領證，工作室幽默發文反問「姐姐領證了？我們怎麼都不知道？」。但今次，當傳媒向經紀公司求證，對方只講咗一句「藝人的私生活，沒有回應」，不承認亦不否認，態度急轉直下，令外界浮想聯翩，網民紛紛猜測係婚訊屬實、公司不便代為否認。
感情線方面，二人自2016年傳出緋聞，2018年正式公開認愛，走足八年。作為虔誠基督徒嘅G.E.M.過去曾直言想生BB，但大前提係「先結婚、後生仔」。
而婚訊爆出嘅前一天（10月5日），G.E.M.嘅《I AM GLORIA》世界巡迴演唱會喺深圳收官，總共182場、其中170場喺體育場，創全球體育場演唱會女歌手最高紀錄，獲健力士世界紀錄認證。新專輯先行曲《自由嘅你》則由10月6日起喺串流平台上架，由李榮浩操刀製作。
姣姐講多句：公司由「大動作打臉」轉做「冇回應」，呢個態度轉折本身就係最大嘅新聞。婚訊係咪屬實，等佢自己講嘅時候先算數，我地坐住睇。
黃姣姐整合｜頂硬上
