歌手湯令山（Gareth.T）正式宣佈，將於2027年1月20日至23日首次登上紅館舞台，舉行一連4場《湯令山Coliseum演唱會2027》，門票定於11月3日優先發售。
最有趣嘅，係呢個演唱會名嘅由來。佢自爆以前每次call車去紅館睇演唱會，都照例打下目的地嘅英文名「Hong Kong Coliseum」，後來一查字典，發現「Coliseum」原來仲有「鬥獸場」嘅意思，覺得好有趣。等到知道自己終於可以踏上紅館，即刻想起呢個字，決定將「鬥獸場」玩成整場演唱會嘅核心概念，預告會將紅館化身成一個充滿戲劇張力嘅斗獸場。
為配合呢個概念，佢嘅人生第一張紅館海報都拍得夠認真：花上兩個半小時做特效化妝，將自己變成一尊羅馬石像，連皮膚都呈現雕像質感。海報由好友Hanley Chu任創意總監兼操刀拍攝，「東風財運」負責幕後創作。佢笑言：「其實唔算太辛苦，為咗藝術都值得嘅！」
唔止扮石像。拍攝當日佢嘅健身教練更現身，先帶佢操肌令身型拍出來更好，之後大家愈玩愈盡：最初只係設計簡單石像站立，後來一致決定玩大啲，佢不單扮超人、扮搞笑、扮健美高手，動作難度直升，令羅馬雕像造型更具戲劇感。
而對歌迷最關心嘅「會唔會加場」，Gareth.T話公司決定一次過公佈4場，暫無加場計劃，更直接向歌迷喊話：「唔會再加場！所以想去嘅話，就買飛啦！」
姣姐講多句：由以前call車去紅館當觀眾，到食足「紅館」兩個字變成鬥獸場，再自爆做海報係為晒藝術，連「唔加場」都喊得咁有自信——由嗰個填Coliseum嘅人，變成填Coliseum嘅人，呢個角色反轉，確實係有夠鬥。
黃姣姐整合｜頂硬上
