一位距離IANG續簽只剩11個月嘅港碩畢業生，近日喺小紅書發文，直言「離HK續簽還剩11個月，我對香港沒了濾鏡」，話盡由讀書到求職嘅碰壁經歷。呢位PO主話，由申請到讀書結束一年內花咗30萬，畢業後投咗5、600封簡歷，「基本都石沉大海」。
佢原本喺內地做市場營銷，以為返港可以發揮所長，未諗到一入行就俾人潑冷水：「這個崗位本地人都在搶，何況你外來的，還沒有國外學歷。」佢自己上LinkedIn求證，「隨便點開一家相關的招聘公司，個個都是海外背景，再不濟都是香港本地讀的大學。」雖然最終靠資歷同「要求不高」揾到一份工，佢仍然慨嘆「香港的marketing和內地完全兩個世界」。
講到佢嘅受養人，經歷更為挫敗。入職一間小公司做Marketing，老闆連15K都唔肯給，仲反覆用「內地幾千塊的人都可以做」壓價；加上每日深港通勤超過4小時，「一週時間他瘦了10斤」。PO主形容身邊好多人「內地工作起碼體面，在香港牛馬都不如」。
更絕係招聘會經歷：受養人想報讀治療師助理培訓班，職員一聽佢冇永居又冇單程證，「立馬把報名錶一把搶回去」，現場淨低門市同清潔等體力工。受養人當日返去即轉投內地公司，迅速攞到3個面試。
帖文引來網民共鳴，有人話「IANG的出路，基本都在保險上，香港的產業結構也基本決定了這一點」；亦有網民批求職者「嚟嘅時候無諗過現實生活問題只能是自己天真」。
【姣姐講多句】30萬讀一年書、600份CV、4小時通勤、一週瘦10斤——呢啲數字背後，每個都係一個認真嚟揾飯食嘅人。受養人講「香港只歡迎外國人、本地人、有錢人、高學歷的人」，話得夠直接，亦夠殘忍。呢種「冇你哋位置」嘅感覺，唔係單一個體嘅遭遇，而係產業結構同簽證制度雙重夾縫下嘅現實。對住呢類帖文，最難做到嘅唔係搞笑，而係認真對住事實。
黃姣姐整合｜頂硬上
