近日一名港漂博主喺小紅書發短片，話「香港 700 多萬人口，有 200 多萬住公屋，其實住公屋嘅人比所謂中產過得好得多」，仲逐筆列開支。佢話公屋家庭夫妻月入共約 4 萬，扣完開支「還能剩下兩萬左右」，朋友「想起來就去日本去泰國，偶爾甚至去歐洲」。反觀中產，月入 10 萬，「三四萬按揭、國際學校兩萬、養車一萬多」，結果「十萬幾乎省不下什麼錢」。
呢個對比表一放出去，留言區即刻炸。有網民直斥「唔好知少少扮代表啦」，逐條拆穿四大盲點。
第一，公屋醫療學校免費？中產一樣去得。 博主話公屋住户看醫生上學幾乎免費，網民反駁：「反對，中產一樣的可以去公立醫院，一樣的可以去公立學校！」中產去私院，多數「是有保險的人看」，唔係人人自掏腰包。
第二，國際學校純屬少數。 「讀國際學校畢竟是少數，不能用這個作為推算。」網民指中產家庭「最多也是讀個直資學校」，博主以偏概全，同現實脱節。
第三，公屋不用交税？ 呢句最離譜。博主話住公屋「不用交税」，網民即刻：「住公屋不用交税？！」薪俸税按個人入息計算，同你住公屋定半山豪宅冇任何關係。一對夫婦月入 4 萬、年收入 48 萬，扣完基本免税額同強積金，照樣按累進税率納税。
第四，私樓開銷換生活質素。 「人傢俬樓的生活質素也不是白享受的啊。」有網民講得更直接：「我是寧願自己買樓，不願意住公屋，因為我要篩選鄰居。」
不過留言區都有另一邊，供樓壓力大嘅網民共鳴：「供樓幾萬一個月，在公屋幾千不到」，現金流確實有吸引力。
事實係，按房委會現行規定，2 人家庭公屋入息上限約 20,680 元。月入 4 萬，輪候冊申請者早已超標出局；現有住户喺「富户政策」下要定期申報，超標者隨時要繳交倍半甚至雙倍租金另加差餉，嚴重者觸及遷出門檻。博主呢個「月入 4 萬住公屋無痛儲 2 萬」嘅畫面，喺現行政策下已經唔存在。
姣姐講多句：博主嘅心願我 Understand，供樓壓力大係真，公屋租金幾千塊嗰個確係舒服。但係將「富户政策」同「薪俸税」一筆帶過，就屬知少少扮代表。港漂嘅香港觀，有時真係同本地生活脱節咗。住公屋唔代表不用交税，呢個係常識。
