近日，一個Facebook社團「毒姑九賤婆媳討論區」嘅帖文鬧到滿天飛。一名女網友話，佢奶奶打電話過嚟，轉述阿姨嘅投訴：佢喺一場喪禮上「冇打扮」，穿着「隨便」。

原PO一時嬲到直接問奶奶：「奔喪要穿得多華麗？」奶奶冇退縮，反駁：「看妳行為舉止就知道平常都沒在打扮，也不穿漂亮衣服」，仲補一刀：「人要衣裝，妳的穿著讓人看不起」。

原PO喺帖文入面逐件解釋當日嘅穿搭：深黑色衣服，「9成新沒有破洞、褪色，領口沒有皺摺」，合身。佢話自己平時就鍾意黑色系，因體型較胖，着乾淨平價服飾，搭防曬外套同慢跑鞋。而奶奶嘅「標準」係乜？「亮片、薄紗」，「有女人味一點」。

帖文一出，留言區炸咗。支持原PO嘅寫：「喪禮又不是家庭聚會，要打扮什麼？」；「會看不起妳的人，穿什麼她們都會看不起」。亦有較温和嘅聲音話：「有重要的正式場合，再注重打扮就好」、「我覺得穿著是其次，健康最重要」。

姣姐講多句：呢單嘅核心從來都唔係衣服。着黑衣奔喪，係最正常嘅禮數；着亮片薄紗去奔喪，先真係「被人看不起」。兩代人對「女人應該點樣」嘅想像，喺呢度撞得粉身碎骨。

黃姣姐整合｜頂硬上