新一年想旺財，命理專家詹惟中話，原來最貼地嘅開運法寶，就喺你飯碟入面——一雙筷子。佢形容筷子係「餐桌上的風水小精靈」，成套「隱藏功能」都靠諧音同擺位。
據佢話，筷子有「靈動性」：用紅線綁住放床頭可以招桃花；吊掛喺窗頭前象徵平安；放喺紅包袋、保險箱或者收銀機，就係招財。講到擺放禁忌，佢特別強調千祈唔好將筷子插在碗上，因為呢個動作「關鍵在於標示那是給好兄弟」，財神爺會俾嚇走。
笑位嚟自個「筷」字，諧音「快」，寓意「快快發財」、「快快脱單」、「快快下班」；新筷子先至有勁，用舊筷子就淨係「慢慢來，比較快」。另外 2 根 1 雙象徵「好事成雙」，佢話跨年千祈唔好只執一根，「否則好運會像邊緣人一樣孤單」。
詹惟中最後建議，新年不妨換一副新筷子，心中默唸「筷筷發財、筷筷平安、筷筷找到停車位」，「透過儀式感，讓氣場直接提升，幫助吸引好運來」。
姣姐講多句，呢套擺位最貼香港地就係「筷筷找到停車位」呢句——招財招平安都係小事，揾個車位先係大家年年真心嘅祈求。用儀式感提升氣場，同你個個朝朝轉三圈揾個位，原理其實似有似無。
黃姣姐整合｜頂硬上
