昨日（11月4日），HONOR 喺香港故宮文化博物館開咗場發布會，正式宣佈旗艦機 HONOR Magic9 Pro Max 登陸香港。現場最矚目嘅，係馮德倫以「導演」身分，用部新機拍喺場首映。
場內除咗放映，仲設咗經典 ARRI 攝影機同由金像獎最佳美術指導文念中操刀嘅「香港電影靈魂場景美術展」。一邊係老派膠片機，一邊係部最新手機，擺埋一齊本身就夠荒謬，而馮德倫偏偏就喺呢個對照之間發聲。
馮喺台上話，電影感唔止畫面精美，更係聲畫配合出嚟嘅層次感、景深同收音嘅空間感。佢話：「以往要整個工作團隊合力操控不同設備，現在一部功能強大的手機即可大大提升創作自由度，並獲得接近專業電影水平的作品。」
記者會後跟問佢用手機拍同真正拍戲有乜不同。佢答：「首先用手機拍唔需要咁多Crew，對於一啲想比較輕便同簡單安靜拍攝嘅人，係非常之一流。」
問拍街景難易度，佢就：「我覺得難度低咗，因為如果大棚人喺度拍嘢，會引嚟好多途人圍觀，如果用手機拍就會安靜好多，嗱嗱聲就搞掂。」
有無試過成部戲都用手機拍？佢話視乎題材，「依家都證明咗邊個攞住部手機都可以非常有創意拍到自己想要嘅嘢」。
姣姐講多句：一部旗艦手機喺台上被稱「接近專業電影水平」，呢個反差本身已經夠荒謬。手機拍戲有無可能真係取代棚機，呢個要影靚影到觀眾買單，先講到點。
黃姣姐整合｜頂硬上
