喺港鐵、商場行扶手電梯，相信各位都見過踏板兩側貼近邊邊嗰一排黑色毛brush。因為位置剛好同鞋面齊平，好多人走上去會順手把腳靠過去，以為可以「搭個順手刷鞋」，甚至覺得呢啲毛brush就係俾人刷鞋用。機電工程署今番就正式澄清：呢做法唔止錯誤，仲係極度危險。
原來呢排黑色毛brush有個正式名稱，叫做「裙板偏轉裝置」，沿護裙板兩側安裝。機電工程署《自動梯現代化指引》寫明，喺裙板上設置毛brush型偏轉裝置，作用就係將乘客嘅腳、鞋履同鬆散衣物推離梯級同護裙板之間嘅空隙，減低被夾困嘅風險。
原因唔難明：扶手電梯行緊嘅時候，梯級不斷移動，但兩側護裙板係固定嘅，唔會跟隨梯級活動，所以兩者之間必須保留細小間隙。呢個間隙就係極容易出事嘅位，黑毛brush就負責「提醒」乘客唔好太貼近呢個潛在危險位置。
機電工程署同時列出幾項安全須知：
鞋子貼兩側極度危險。 移動中嘅梯級同固定護裙板之間有狹窄縫隙，鞋子（尤其軟膠鞋、洞洞鞋、長裙裙擺或者鞋帶）貼近兩側，極易被捲入縫隙造成夾傷。
軟膠鞋同長裙風險更高。 橡膠雨鞋、洞洞鞋呢類材質柔軟嘅鞋摩擦力大、易變形，極易被縫隙「咬」住；長裙或者寬鬆衣物垂下時，一樣容易被捲入。
正確站法係站喺梯級黃色安全線內，雙腳千萬唔好緊貼兩側毛brush或者護裙板。
黑毛brush本身冇感應停機功能。 鞋或者衣物碰到毛brush，扶手電梯唔會自動停；只有物件真係被捲入梯級同護裙板縫隙，先有可能觸發停機，而到時往往已經發生意外。
如遇衣物、鞋履被夾，唔好強行拉扯，應立即按動扶手電梯兩端嘅緊急停機掣。
姣姐講多句： 呢啲黑毛brush就係日常最唔起眼、最容易被忽略嘅安全配件，暗藏精密設計。下次再行街搭梯見到，千萬唔好再當佢係免費腳部美容用品——真係想刷鞋，落低梯再去啦。
（黃姣姐整合｜頂硬上）
