57 歲鄭嘉穎近日喺香港一間人氣平民兩餸飯店被捕獲，自攜銀包排隊揀餸，行為貼地，引來大批網民圍觀。相片曝光後，有人好奇佢買咗咩餸，貼圖網民回應：「他打包的梅菜扣肉」——隨即有網民笑指呢道菜正正係老婆陳凱琳最鍾意食嘅菜式，寵妻一面盡露。
相片入面，佢身穿 Polo 恤配長褲，戴住墨鏡，打扮低調但星味十足，一路行入櫃枱前，手持銀包自己揀餸、攞飛、俾錢，全程禮貌友善，零明星架子。
貼圖網民原文寫道：「誰懂啊家人們！在香港權發小廚吃個快餐，居然碰到鄭嘉穎來買菜！愣了好幾秒才敢確認是『八爺』本爺。原來男神私下真的會來這種平民小店買菜，一點架子都沒有，太接地氣了。沒敢上去打擾，遠遠看著就已經很滿足！」
照片一出，大批網民大讚佢 57 歲仲保養得宜、貼地有禮。
陳凱琳比鄭嘉穎細 22 歲，結婚後育有三子。近年佢轉型做 KOL、攻內地市場拍綜藝，吸金力驚人；鄭嘉穎反而將重心放返屋企，專心湊仔，享受家庭樂。
姣姐講多句：中年港星再出頭路有兩條路——有人學老婆做 KOL 攻內地，有人學老公返屋企幫手煮飯。鄭嘉穎揀咗後者，仲有得老婆心水菜式，呢種「兩餸飯」生活，真係比紅毯光鮮亮麗得多。
黃姣姐整合｜頂硬上
