你每日搭𨋢，有冇諗過原來嗰個微細動作，已經暴露咗你嘅工作能力，老細正喺度決定你係「潛力股」定「仙股」？
曾任日本星巴克CEO嘅岩田松雄，近日喺日本President Online專欄撰文，話判斷一個人有冇領袖潛能，睇佢「點搭𨋢」就一清二楚。重點只有一個：你係先按「樓層鍵」，定先按「關門鍵」？
喺岩田眼中，答案冇得揀——必須先按「關門鍵」，再按樓層。佢解釋電梯門關閉有緩衝時間，先按關門、喺門準備關上嗰幾秒先按樓層，就唔會耽誤電梯啟動；相反先按樓層再按關門，就白白浪費咗中間嗰段緩衝。
點解要計較區區0.幾秒？岩田話佢年輕時喺日產（Nissan）負責生產管理，成日攞秒錶逐個動作分析，喺製造業多餘一個動作都係浪費。佢話：「公司嘅資源有『人、物、錢、資訊』，但當中只有『時間』係絕對無法挽回嘅。」所以佢覺得，真正嘅精英唔係成日趕，而係喺每個微小細節入面將每一秒都視為珍貴資產。按年累計，呢零點幾秒流失嘅時間「相當可觀」，所以一個識「先按關門鍵」嘅人，代表佢隨時都喺諗點將效率最大化。
圖片：Akonnchiroll／CC BY-SA 4.0／Wikimedia Commons
文章後半段仲由心理學角度補充，話先按關門鍵嘅人傾向「高行動導向」嘅主動型人格，但同時提醒喺重視人際協作嘅現代職場，亦要兼顧「電梯禮儀」，懂得按住開門鍵、甚至利用航程做「電梯演説（Elevator Pitch）」先係兼顧效率同團隊嘅領袖。
姣姐講多句：用搭𨋢按鍵順序去判斷一個人值唔值得用，呢個「人才甄別法」真係既殘酷又荒謬。但講真，呢個笑法好有日本製造業味道——將區區0.1秒都當浪費，精神令人敬佩。不過我個人寧願相信：一個識喺電梯內幫人按住開門鍵嘅人，多數都唔差。
大家下次同老細搭𨋢，記住先按關門鍵先按樓層，莫要慢吞吞暴露咗自己。
黃姣姐整合｜頂硬上
