1996年，鄭伊健為「黃埔新天地」拍廣告兼唱主題曲《發現》，事隔30年，伊健喺10月3日重臨黃埔Tides，一日連開兩場Fanmeet，同逾千名歌迷提前慶祝自己生日，舊地重温，別具意義。
最搞笑係佢早前話呢場係「發佈會」，結果真係發佈咗新Logo，仲有件「EKIN風褸」——就係佢之前預告嘅「EKIN風」。呢件風褸由樂隊Nowhere Boys主音Van嘅太太Wendy團隊設計，喺Fanmeet首度亮相，佢哋夫婦仲即場上台示範穿上風褸嘅特別功能「開心到跳舞」。伊健話：「希望大家著咗呢件『EKIN風褸』都會好開心！」
更勁係佢即場喺台上換衫，大騷黑色背心露麒麟臂，全場尖叫。
成個活動佢都親身兼監製兼導演，一手包辦由rundown到遊戲環節，fans打卡點、留言電話亭、請全場食雞蛋仔同燒賣，每項體驗都係佢親自策劃。fans上台玩遊戲嘅「伊健禮物包」都係佢自己安排，有蛋卷、隱藏版美食券、解壓小玩具同簽名閃卡。
「鐵粉認證」遊戲仲有男歌迷將冷門歌曲intro同變形海報一秒搶答，全場起鬨，伊健大讚實至名歸。之後「大型唱K環節」，大屏出卡拉OK版，全場齊齊合唱《情路狂奔》同《Beautiful Day》。
佢再請出音樂總監陳光榮，宣佈將部分專為演唱會重新編曲嘅經典歌demo輯成專輯《EP》，歌單由歌迷網上投票選出，名就係二人英文名Ekin同Punk合成，台上大屏仲放出佢哋二人陳年合照做封面，全場爆笑。其後四人以acoustic形式唱《一起衝一起闖》、《你的我》、《Love is all》。伊健笑言：「Fans成日話我遲遲都唔出現、好耐先做一次騷、戲又少拍，不過都《值得等》！」又繼續唱《爸爸的汽水》、《極速》、《Together》。
尾聲，大屏播出自世界各地fans示愛同唱歌嘅合輯影片，伊健話好感動。主持人陳海寧（Dee姐）率領全場齊聲「生日快樂」，推出生日蛋糕——第一場嗰個蛋糕由蘇志威大女蘇君蕎（Yumi）炮製，伊健介紹佢時台下fans喊「真係好似劉小慧呀！」第二場完，fans大叫encore不肯走，伊健再出場同每位粉絲擊掌道謝，圓滿收場。
姣姐講多句：做監製兼導演，又要台上換衫、唱K、送禮物包，伊健呢次真係乜都包晒。30年後重臨拍廣告嘅舊地，同歌迷提前慶生，呢種懷舊加寵粉，正正就係歌迷話嘅「值得等」。
