作家雲海日前喺中環聖約翰座堂，無意間撞見共濟會聖殿騎士團舉行感恩彌撒，同埋意外拍到鄧梓峰身穿白色長袍、頭戴十字紅帽嘅「聖殿騎士」造型，並喺社交平台分享咗。呢張相即刻引起網民瘋傳。

雲海聲稱，合照曝光當日，佢收到「共濟會高層」透過朋友轉介要求刪相，佢照做，但之後連日公開表達不滿，更將當日照片用 AI 換臉改圖後再放上網。

事件發酵多時，雲海喺網台節目《三坐山》直播爆料。佢透露事後收到共濟會內部成員親口致歉，又話組織內部並非鐵板一塊，唔好「一竹篙打一船人」，亦坦言為保護介紹人而忍咗耐先講。

相比之下，鄧梓峰（十郎）嘅反應就「反高潮」好多。佢大方承認係聖殿騎士團成員，謙稱資歷尚淺；對合照流出則直言「我幾喜歡張合照」，話唔介意會員身份曝光，仲呼籲有興趣嘅人自行了解，唔好盡信網上陰謀論。

姣姐講多句：一方傳聞「高層」急到要找人傳話刪相，另一方主角就笑住話「我幾喜歡」，呢個反差本身就係最好笑嘅地方。

黃姣姐整合｜頂硬上