61歲嘅張衞健日前喺好友張衞健日前喺好友鄒凱光（灘叔）嘅網上節目《發達夜總會》接受訪問，披露咗佢初出道時無視B級經理人、喺麗晶酒店同A級高層傾續約嘅經過，更重提因《西遊記（貳）》片酬同TVB鬧翻離巢，離巢後被拒上節目宣傳新作嘅舊事。
佢話，當年喺化妝間聽前輩講「A級演員由A級經理人傾，最頂尖嘅仲去麗晶酒店傾」。佢當時未上一線，公司只安排咗B級經理人。佢決定「博一鋪」，無視B級經理人：「我傻呀嘛我！」其後一位A級高層喺停車場截停佢，佢扮繁忙反客為主：「哎呀三點我唔得……不如等你放工六點，六點我哋去Regent（麗晶酒店）傾。」
落座之後，高層話只打算續約3年，仲提「林文龍嗰啲公司捧嘅，全部簽5年㗎！」。張衞健當時係家中唯一經濟支柱，要養做家庭主婦嘅媽媽同兩個喺加拿大讀書嘅弟弟。佢話「我今日唔打算傾錢」，願簽一份金額空白嘅合約，只求公司力捧，更豪言畀機會佢，將來定能為TVB賺大錢。
更好玩嘅係簽約之後。佢話簽完約都仲係浮浮沉沉冇幾多嘢做，嗰位高層於是親自傳授佢「娛樂圈生存之道」：利用「羊群心理」，同記者講「有20部電影揾緊你」。佢話真有用——「唔係誇張呀……每一日起碼一至兩部電影」揾佢合作。
惟佢同TVB嘅關係後來喺《西遊記（貳）》爆煲。片酬談崩，即使佢讓步話「我唔收錢拍啦」，TVB仍堅持換角，佢拒絕續約，毅然離巢。後來宣傳新作，宣傳團隊致電TVB，得到嘅回應係：「有合約先可以上嚟！」
佢而家語帶反諷：「我……真係唔記仇嘅人嚟。」笑稱「過晒去啦，冇乜所謂啦，TVB唔會嬲嘅！」
姣姐講多句：麗晶始終係個麗晶，但入場嗰陣攞緊合約同冇攞合約，待遇係兩個世界。喺內規則叫「潛規則」，出咗個門就只剩一句「有合約先可以上嚟」。呢個就係娛樂圈：唔缺機會，缺嘅係嗰陣敢同你簽空白合約嗰個。
黃姣姐整合｜頂硬上
