英國德文郡南部 Chudleigh Knighton Heath 自然保護區，10月中旬被發現一處已知蟻巢唔見咗，地面留有「用鏟挖掘嘅明顯痕跡」。德文郡野生動物信託基金會（DWT）確認，嗰個蟻巢藏有1,000至5,000隻狹頭蟻（narrow-headed ant），同埋一至多隻可活25年嘅育蟻后，全個被挖走。
呢種蟻頭部有獨特「捏起」嘅形狀，故稱狹頭蟻，過去曾廣泛分佈於英格蘭南部荒原，但過去100年因農地轉型同興建而數量急跌，現被列為第41條物種、全國罕見，IUCN紅色名錄中屬近危。Chudleigh Knighton Heath 係全英最後一個呢物種仍然存活的棲地。
DWT 職員 Stephen Hussey 指，偷蟻者對蟻巢位置「有先備知識」，非識蟻之人唔會隨便揾到。他並推測，事件可能係有人想將蟻移去舊棲地「再野化」，但他話即使係呢個動機，「搬蟻要專業知識，唔係隨便搬就得」；另一可能係昆蟲收藏家。
圖片：Derek Harper／CC BY-SA 2.0／Wikimedia Commons
DWT 狹頭蟻物種康復主任 Julia Balfour 稱此為「重大損失」，一個成熟蟻巢代表多年緩慢增長，無法短期補回，「失去一個蟻群就係失去多年保育工作嘅成果」。
事件已報德文郡及康尼爵警察，警方指故意損毀或打擾法定保護區域屬刑事罪行，並呼籲公眾提供線索。DWT 稱會加強保護區安全並持續常規巡查。
硬蕉抽兩句：偷嘢偷到要識畀蟻分級，仲要識「再野化」，呢個賊比保育員還熟識蟻。話「再野化」？搬蟻都係要執業嘅，唔係搬完當做善事咁簡單。全英最後一窩，搬錯個位即滅絕，呢個「慈善」真係好大個膽。
