Dear Jane 今日（10月3日）首次喺機場出席電台直播節目，四仔興奮到臨時加碼唱多一首，話呢度感覺好好、好想再返嚟玩。
佢哋坦言四人冇試過一齊去旅行，只係試過一齊去外地工作。Howie 仲爆自己曾在北海道被烏鴉踢頭，笑言「可能係因為樣嘅問題」。「旅遊履歷表」環節仲搞笑，四仔互選「旅遊掃興鬼」、「旅遊孤寒鬼」、「是旦跟大隊」同「瞇埋眼買嘢型」，而 Jackal 全部中獎。
最勁係 Tim 爆之前全公司去拉斯維加斯做騷，做完後各自用自己的方法返三藩市。Jackal 同 Nice 搭飛機，佢同 Howie 加另一個同事就揀自駕，由拉斯維加斯穿死亡谷去三藩市。Howie 話谷面收唔到電話、氣温可以跌幾十度，佢哋又冇帶衫、四點先開波，好驚日落前未過到谷，夜黑行錯路碌落山。所以開車前報哂俾同事知：「你見我哋八點鐘唔喺谷嘅另外一邊，就報警執我哋條屍啦。」
Tim 話死亡谷最驚嘅係行懸崖邊山路、冇街燈漆黑一片，但行經黃石公園就覺得好正，嗰陣拉斯維加斯係夏天，黃石公園高海拔仲落住雪。問佢最鍾意同邊個旅行，佢想都唔想答「梗係老婆楊洛婷啦」，話而家帶仔旅行心態唔同，會去主題樂園、主題餐廳嗰啲自己以前唔會去嘅地方，都話隔一段時間要同老婆二人世界，下一個地點都諗好，就係唔知幾時去得。
講返正經，Dear Jane 上月喺澳門開完騷，話今次歌單故意揀冷門歌，仲搞咗個「月亮舞台」，原本擔心觀眾接唔接受，結果氣氛好正。佢哋話想將呢個「月亮舞台」帶來香港，成事嘅話希望喺 2027 年內，之後仲會去內地開騷，而家正籌備出碟。
姣姐講多句：一班大人開車去死亡谷之前先約好報警收屍，呢啲先係真・鐵漢嘅美式幽默。而「月亮舞台」真係落港嘅話，2027 就 2027，我坐住等。
